|
|
जनगणतन्त्रको विवाद माओवादीमा कायमै
काठमाडौं, ०४ मंसिर, १९ नोभेम्वर / नेकपा माओवादीका अध्यक्ष समेत रहेका प्रधानमन्त्रीले पार्टीका वरिष्ठ नेता पोष्टबहादुर बोगटी दिवाकरलाई आज छुट्टै भेटेका छन् । भेटमा पार्टीमा विद्यमान विवाद अन्त्यको उपाय निकाल्नेबारे दुइ नेताबीचछलफल भएको बुझिएको छ ।
प्रचण्डले दिवाकरलाई आफ्नो राजनीतिक प्रतिवेदनमा समर्थन जुटाउन आग्रह गरेका थिए । स्रोतका अनुसार दिवाकरले पार्टीमा आत्मसमर्पणवाद हावी भएको भन्दै असन्तुष्टि पोखेका थिए । यद्यपि उनले विवाद मिलाउन आफूले भूमिका खेल्ने बताएको बुझिएको छ ।
माओवादी भित्र प्रचण्ड र किरणको छुट्टाछुट्टै धार देखापरेपछि विवाद बढिरहदा प्रचण्डले दिवाकरलाई भेटेका हुन् । माओवादीको बैठक आज पनि बस्दैछ । बैठकले भोलि देखि हुने राष्ट्रिय कार्यकर्ता भेलामा लैजाने राजनीतिक प्रस्ताव तय गर्नेछ ।
बैठकमा अध्यक्ष पुष्पकमल दाहाल र संगठन फाँट प्रमुख मोहन वैद्यले अस्ति पेश गरेका छुट्टाछुट्टै प्रस्तावमाथि छलफल हुनेछ । दुवै नेताका प्रस्तावित प्रतिवेदनमा रहेका मुख्य विवाद मिलाएर एउटै प्रतिवेदन बनाउने प्रयास माओवादीमा भइरहेको छ ।
विवाद मिलाउन हिजो पनि प्रधानमन्त्रीको सरकारी निवास बालुवाटारमा केही केन्द्रीय नेताहरूले आन्तरिक छलफल गरेका थिए । दुवै पक्षले आ-आफ्ना अडान नफेरेपछि हिजोको छलफल निष्कर्षविहीन भएको हो ।
बैठकमा दुवै प्रस्तावलाई एक बनाउने वा वैद्यको प्रस्ताव फिर्ता गर्न लगाउने प्रयास हुने एक केन्द्रीय सदस्यले बताएका छन् । जनगणतन्त्रको कार्यान्वयनबारे माओवादीमा मुख्य विवाद रहेको छ ।
अध्यक्ष प्रचण्डको प्रतिवेदनमा लोकतान्त्रिक गणतन्त्रलाई संस्थागत गर्ने कार्यदिशा तोकिएको छ भने संगठन फाँट प्रमुख वैद्यले जनगणतन्त्रमा जानुपर्ने फरक प्रस्ताव राखेका छन् ।
|
|
