|
|
राजपरिवारका सालिकहरू सङ्ग्राहलयमा राखिने
उपप्रधानमन्त्री तथा गृहमन्त्री बामदेव गौतमले काठमाडौँ उपत्यकामा रहेका पूर्वराजा र राजपरिवारका सदस्यहरूका शालिकहरू सार्वजनिक ठाउँहरूबाट हटाइ सङ्ग्रहालयमा राख्ने बताएका छन् । उनले कुन शालिक हटाउने र कसको राख्ने भनेर उपत्यकाभित्रका सबै राजनीतिक दलको सहमतिमा निर्णय गर्ने बताए । काठमाडौँको केन्द्रभागमा रहेको रत्नपार्कमा बनाउन लागिएको नेपाल भाषाका प्रवर्तक एवम् राष्ट्रिय विभूति शङ्खधर साख्वाको शालिक तथा सहिद स्मारकको शिलन्यास गर्दै उपप्रधानमन्त्री गौतमले यस्तो बताए ।
राजाहरूका शालिक मात्र होइन राजनीतिक नेताहरूमा रहेको राजा प्रवृत्तिलाई पनि सङ्ग्रहालयमा सिमित गर्नुपर्ने पनि उनले बताए । काठमाडौँ उपत्यकालाई शान्ति सुरक्षा कायम गर्न र जनतालाई सुरक्षाको प्रत्याभूति दिन सरकार तत्पर रहेको बताउँदै गृहमन्त्रीसमेत रहेका उपप्रधानमन्त्री गौतमले सुरक्षाको वातावरण बनाउन जनताले सरकारलाई सहयोग गर्न आहृवान गरे । उपप्रधानमन्त्री गौतमले सबै अराजकता समाप्त गर्न सरकार चाहन्छ र सबै क्षेत्रका अराजकता अन्त्य गर्नेतिर सरकार लागिसकेको समेत सो अवसरमा बताए । |
|
