बारा, २५ कात्तिक
नोभेम्बर १०, २००८
बाराको रतनपुरी गाविसस्थित हलखेरिया जंगलमा तीन वर्षदेखि तपस्यामा बस्दै आएका तपस्वी रामबहादुर बमजन सोमबार सार्वजनिक भए । उनले जंगलमै आफ्ना 'भक्तजन’लाई भेला गराएर प्रवचनसमेत दिएका छन् । आफ्नो बाल्यकालको वर्णनबाट प्रवचन सुरु गरेका बमजनले आफू ६ वर्षको हुँदा गाउँनजिकै मरेको मानिस जलाइरहेको देखेपछि मानिसको किन र कसरी मृत्यु हुन्छ भन्ने खोजमा लागेको बताए । धर्मशास्त्रले भनेअनुसार समाज नचलेकाले देशमा हिंसा बढेको उनको भनाइ थियो ।

'मानिसले धर्म पालन गर्न छाडेकाले नै यहाँ हत्या-हिंसा बढेको हो,’ उनले भने । बमजनले तपस्याको माध्यमबाट आफू समाजमा शान्ति ल्याउन लागिपरेको दाबी गरे । धर्मको माध्यमबाट नै मानिसले सुख प्राप्त गर्न सक्ने उनले उल्लेख गरे । करिब ४५ मिनेट बोलेका बमजन प्रवचनका क्रममा पटक-पटक अड्किएपछि नजिकै बसेका एक लामा सहयोगीमार्फत आफ्ना भनाइ पूरा गरेका थिए । सहयोगी लामासँग बमजनले तीनपटक कानेखुसी गरेर प्रवचन सिध्याए । विभिन्न जिल्लाबाट आएका हजारांै भक्तजनले तपस्वीबाट आशीर्वादसमेत थापेका थिए । तपोवन संरक्षण समितिले स्थानीय एफएम र पत्रपत्रिकामार्फत तपस्वीले सार्वजनिक भई प्रवचन दिने सूचना गरेपछि दर्शन गर्न आउनेको संख्या बढेको थियो । ०६२, जेठबाट जंगलमा निराहार तपस्यामा बसेका भनिएका बमजन यसअघि दुईपटक बेपत्ता भएर पुनः सार्वजनिक भएका हुन् । बमजनले मंसिर ३ गतेसम्म आफ्ना भक्तजनलाई ँदर्शन’ दिने बताएका छन् ।