|
|
अरुणिमाले लेखिन फिल्म को कथा
हिरोइनले फिल्ममा लगानी गर्नु नौलो कुरो रहेन । बरू, हिरोइनले फिल्मको स्क्रिप्ट लेख्नुचाहिँ 'आश्चर्य' हुन सक्छ । र, यसको सुरुवात भएको छ- अरुणिमा लम्सालबाट । उनले नयाँ फिल्म 'दीपशिखा'को स्क्रिप्ट लेखेकी छिन् ।
   
निर्देशक नरेश पौडेलको 'ड्रिम-प्रोजेक्ट' मानिएको 'दीपशिखा'को चर्चा चल्न थालेको दुई वर्षअगाडिदेखि नै हो । तर, फिल्मको औपचारिक सुरुवात भने बिहीबार बंगलामुखी मन्दिरबाट गरिएको छ । दुई चलचित्र निर्माता संघका अध्यक्षद्वय अशोक शर्मा र राजकुमार राईको संयुक्त सहभागितामा 'दीपशिखा'को मुहूर्त सम्पन्न भएको छ ।
मुहूर्त सटमा अरुणिमा, जीवन लुइँटेल, नीरज बराल र ममता प्रधानले अभिनय गरेका थिए । निर्देशक पौडेलले अरुणिमाबाहेकका यी सबै कलाकार लामो समय लगाएर छनोट गरेका हुन् । राजेश हमाल र निखिल उप्रेतीबिना नै उनले फिल्मको प्याकेजिङ गरेका छन् ।
यसअघि श्रीमान् निर्माता भएको अवस्थामा हिरोइनहरूले कथासम्म लेख्दै आएका हुन् । कुनै हिरोइनले स्क्रिप्टमा कलम चलाएको यो सम्भवतः पहिलो फिल्म नै हो । अरुणिमाले आफ्नो स्क्रिप्ट्मा कस्तो कथा उधिनिछिन् त ? सबैलाई चासो लाग्नु स्वाभाविकै थियो । तर, अरुणिमा भने अहिले नै कथाको रहस्य खोल्ने पक्षमा छैनन् । उनले भनिन्, 'अहिले नै सस्पेन्स किन खोल्नु ?'
स्क्रिप्ट लेखे पनि डायलगको जिम्मेवारी भने अरुणिमाले निर्देशक पौडेललाई नै सुम्पेकी छिन् । डायलग पनि उनैले लेख्दा फरक त पर्ने थिएन । तैपनि अरुणिमाको तर्क यस्तो छ, 'डायलगचाहिँ अलि परिपक्व मानिसले लेख्नु राम्रो हो, त्यसैले त्यो काम नरेश सरलाई दिएकी हुँ ।'
अमृता ढकालको लगानी, शम्भु सापकोटाको छायांकन, वसन्त श्रेष्ठको नृत्य र एनबी महर्जनको द्वन्द्व रहेको 'दीपशिखा'को छायांकन केही दिनमै सुरु हुने बताइएको छ । अमृता आर्टस् प्रालिको ब्यानरमा बनेको यो फिल्म निर्देशक पौडेलको होम-प्रोडक्सन हो ।
छोराहरु ले पनि अगाले बाबुको बाटो
निर्माता एवं वितरक उद्धब पौडेलले आफ्ना छोरा निरकलाई निर्देशनमा उतारेका छन् । आफैंले निर्माण गरेको चर्चित चलचित्र 'कुसुमे रुमाल'को सिक्वेल बनाउने जिम्मेवारी दिएर । छोराको कार्यशैलीमा उनको आँखाले
खोट देखेको छैन । अझ नेपाली सिनेमामा नयाँपन भर्न नयाँ पुस्ताकै आगमनको खाँचो देखेकाले छोरालाई यो क्षेत्रमा ल्याउन प्रयास गरेको समेत बताउन पछि परेका छैनन् उनी ।
कुरा आफ्नो छोराको मात्र होइन । 'ट्युनिङ' मिलाउने बाहनामा अन्य सहकर्मी पनि छोरा पुस्ताकै रोजे उनले । शम्भुजित बाँस्कोटाका छोरा सौर्यजितको संगीत एवं उदितनारायण झाका छोरा आदित्यको स्वरमा चलचित्रको सांगीतिक सामग्री तयार पारेपछि उद्धबसँग गतिलै विषय बन्यो 'नयाँ पुस्ताको सहभागितामा नयाँ शैलीको सिनेमा निर्माण हुँदैछ' भन्नका लागि । पौडेलले ठानेका थिए- 'छोरा पुस्ताको करामतको खुब चर्चा होला ।' तर, सो चलचित्रको अडियो क्यासेट विमोचन समारोहमा त्यस्तो प्रतिक्रिया सुनिएन । बरू धेरैको मनमा लागेको रहेछ- 'नयाँ पुस्ताले त नयाँ विषयमा सिनेमा बनाएको भए पो । यो त कुसुमे रुमालको आडमा चल्ने प्रयास मात्र होलाजस्तो छ ।'
त्यसो त 'सिक्वेल' बनाउन तम्सिएका नयाँ पुस्तालाई आशीर्वाद दिने मूल सर्जक पनि थिएनन् समारोहमा । 'कुसुमे रुमाल'का निर्देशक तुलसी घिमिरे, संगीतकार रञ्जित गजमेरको योगदानलाई पनि सिक्वेलकर्मीले सम्भिmएनन् । तथापि मूल चलचित्रका नायक भुवन केसीले भने चलचित्रको सिक्वेल तयार हुन लागेकोमा खुसी व्यक्त गर्दै सफलताको शुभकामना दिए ।
नेपाली चलचित्रका दर्शकसामु नयाँ शैली पेस गर्न आएका निरकको भागमा कस्तो नतिजा हात लाग्ने हो, हेर्न बाँकी नै छ । तर, चलचित्रकर्मी बाबुका छोराहरू भने यो क्षेत्रमा खासै सफल छैनन् । नामको सूची लामै छ, बाबुको बाटोमा लाग्ने छोराहरूको । तर, सफल छोराहरूको सूची भने छोटै छ । प्रकाश थापाका छोरा विजय थापा निर्देशनमै क्रियाशील व्यक्ति हुन् । उनले केही टेलिसिरियल र दुई चलचित्रको निर्देशन गरेका छन् । 'मलाई माफ गरिदेऊ' र 'सुन्दर मेरो नाम'को निर्देशन गरेका विजयको ख्याति भने त्यति उचो रहन सकेन । निर्देशनको मैदानमा उत्रिँदा थापाप्रति धेरै आशा गरिएको थियो ।
शम्भु प्रधानका छोरा चंकीको चासो पनि चलचित्रतर्फ नै तानिएको छ । निर्देशक बाबुका यी छोरा भने 'क्यामेराम्यान' बन्ने धुनमा छन् । 'मलाई यो विधामा रुचि छ,' चंकीले आफ्नो इच्छा सुनाए । प्रधानकी छोरी ईश्वरी हाल सिने-क्षेत्रभन्दा बाहिर छिन् । तथापि चलचित्र निर्देशनमा आफ्नो रुचि रहेको उनले बताइन् । 'म इन्ट्री गर्ने बाटो हेरिरहेको छु । मेरो पुनरागमन अभिनयबाट मात्र हुँदैन' भन्छिन् उनी ।
|
|
