|
नेपाली कांग्रेस द्वारा माओवादीको कडा आलोचना
2008-11-15
नेपाली काँगेसले राष्ट्रिय जनजागरण अभियान अन्तरगतको वीरगञ्जमा सम्पन्न सभामा नेताहरुले माओवादीको कडा आलोचना गरेका छन्।
काँग्रेस सभापति गिरिजाप्रसाद कोइराला लगागतका नेताहरुले माओवादी संविधान निर्माण गर्न नचाहेको आरोप लगाएका छन ।
काँग्रेस सभापति कोइरालाले माओवादीले नयाँ नयाँ कुरा उठाएर संविधान निर्माणलाई ओझेलमा पार्ने कार्य गरिरहेको आरोप लगाए।
उनले संविधान लेखनको नेतृत्व कांग्रेसले गर्ने दावी पनि गरे ।
उनले आफ्नो अत्यन्त छोटो भनाइमा तराइवासीलाई काँग्रेसले उच्च महत्व दिदै आएको दावी गरे।
काङ्ग्रेसले तराईका डा रामवरण यादवलाइ राष्ट्रपति बनाएको बताउंदै कोइरालाले तराइका कार्यकर्ताहरुलाई भयमुक्त भएर सभाबाट फर्कन आग्रह पनि गरेका थिए।
कार्यक्रमका वक्ताहरुले माओवादीको आलोचनामा अधिकांश समय खर्चेका थिए ।
काँग्रेसका वरिष्ठ नेता शेरबहादुर देउवाले सरकारले माओवादी कार्यकर्ता पाल्ने बजेट ल्याएको आरोप लगाउँदै सेना समायोजनको कडा विरोध गरे ।
उनले माओवादी सेना पार्टीप्रति आस्थावान रहेको उल्लेख गर्दै नेपाली सेनामा त्यसको समायोजन गर्न नहुने बताए ।
एक दर्जन भन्दा बढी वक्ताहरुले बोलेको कार्यक्रममा स्थानीय मुद्दाहरुको चर्चा नगरिएको गुनासो सभाका सहभागीहरुले गरेका थिए ।
उनीहरुले बारा तथा पर्सा जिल्लामा शान्तिसुरक्षाको स्थिति दयनीय रहेको, उद्योग धन्दाहरु बन्द हुन थालेको र व्यापारी एवम् सर्वसधारणहरु पलायन हुन थालेको बारे चर्चा नगरिएको बताए।
सत्तासीन दलहरुको सभा जस्तै तामझाम देखिएपनि सभामा अपेक्षा गरिए अनुरुपको सहभागिता नभएको टिप्पणी सञ्चारकर्मीहरुले गरेका थिए। | 
