सर्वोच्च अदालतले फ्रान्सेली नागरिक चार्ल्स शोभराजमाथि लागेको आरोपलाई सदर गरेको छ । शुक्रबार सर्वोच्चले पुनरावेदन अदालत पाटनको सर्वस्वसहित जन्मकैद गर्ने फैसलालाई सदर गरेको छ । उनीमाथि हत्या गरेको तथा जाली पासपोर्ट बनाएको अभियोग लागेको थियो। न्यायाधीशद्वय रामकुमार प्रसाद शाह र गौरी ढकालको संयुक्त इजलासले पुनरावेदन अदालतको फैसलालाई सदर गर्ने निर्णय सुनाएको हो । शोभराजविरुद्ध वकालत गर्ने कानून व्यवसायीहरुले भने अदालतको उक्त निर्णयको स्वागत गरेका छन्।
 
सर्वोच्चको फैसलालाई उनकी श्रीमती निहिता विश्वासले भने न्यायधीसले घुस खाएर शोभराज विरुद्ध गरिएको भन्दै अन्तर्राष्टिय अदालत जाने बताएकी छिन् । शोभराजको पक्षमा वकालत गर्नेमध्येकी एक तथा सासु शकुन्तला थापाले पनि अदालतको फैसलाई आफुहरुलाई मान्य नहुने बताइन ।

अमेरिकी महिला कोन्निजो ब्रोनचिजको हत्या गरेको अभियोगमा शोभराजलाई काठमाडौं जिल्ला अदालतले सर्वस्वसहित जन्मकैदको फैसला सुनाएपछि उनी पाँच बर्षदेखि जेलमा थिए । शोभराज जीवनका करिब २० वर्ष विभिन्न अपराधवापत जेलमा बिताइसकेका व्यक्ति हुन। उनी ७ वटा देशका जेलमा परिसकेका छन्। उनीविरुद्ध २० वर्ष कैद सजाय सुनाइएको थियो। जसमध्ये उनले ६ वर्ष बिताइसकेका छन् । यो फैसलाअनुसार अब उनले बाँकी १४ वर्ष जेलमै बिताउनुपर्नेछ।