-भीम के सी कमल
लिस्बन, २१ जुलाइ

नेपाल र पोर्चुगल बीच नागरिक, सामाजिक र सांस्कृतिक  क्षेत्रमा सहयोगको आदान प्रदान गर्दै दुइ देशको सम्बन्धलाइ सुदृढ पार्ने उद्धेश्यका साथ गत बर्ष स्थापित प्रतिष्ठित पोर्चुगिस नागरिकहरुको समेत सहभागिता भएको संस्था पोर्चुगल नेपाल मैत्री संघको पुर्ण बैठक संघको कार्यालय लिस्बनमा सम्पन्न भयो।

 

संघका अध्यक्ष मकर हमालको अध्यक्षता, महासचिब रोजी ब्लाण्डीको रिपोर्टिङ र सचिब झलक के सीको संचालनमा सम्पन्न उक्त बैठकले बिभिन्न महत्वपुर्ण निर्णयहरु गरेको छ।

 

नेपाली खानाको पोर्चुगलमा प्रचार प्रसारको निमित्त प्रकाशोन्मुख पुस्तकमा रेसिपी लिन बाँकि नेपाली रेष्टुरेन्टहरुबाट यथाशिघ्र रेसिपीहरु लिइ आगामी नोभेम्बर महिना भित्र प्रकाशन गरि सक्ने निर्णय सो बैठकले गरेको छ। साथै पोर्चुगल अपाङ्ग संघको रेखदेखमा रहेका ४० जना अपाङ्ग बालबालिकाहरुको निमित्त नेपाली खाना तयार गरी आगामी अगष्त महिनामा अभिप्रेरणात्मक डिनर कार्यक्रम आयोजना गर्ने निर्णय गर्दै सो को ब्यबस्थापनको निमित्त संघका कोषाध्यक्ष रमेश गुरुङ् र मेडिया एडभाइजर भीम के सी कमललाइ जिम्मेबारी तोकिएको जानकारी प्राप्त भएको छ। स्मरणिय छ संघले यस अघि च्यारिटी रात्रीभोज आयोजना गरी नेपालका दृष्टीबिहिन बिद्धार्थीहरुलाइ रू ५०,००० सहयोग उपलब्ध गराइ सकेको छ।

 

पोर्चुगलमा नब-आगन्तुक नेपालीहरुलाइ आधारभुत पोर्चुगिस भाषा सिकाउन आवश्यक रहेको महशुस गर्दै संघले एनआरएन पोर्चुगलसंगको सहकार्यमा हप्ताको २ दिन पोर्चुगिस भाषा कक्षा संचालन गर्ने निर्णय गरेको छ। यस अतिरिक्त पोर्चुगलमा बेरोजगार रहेका नेपालीहरुलाइ रोजगार प्राप्तिको निमित्त आवश्यक सूचना प्रबाह तथा श्रोत पहिचान गर्ने जिम्मेवारी बैठकले संघका कन्ट्री को-अर्डिनेटर जोआँओ टुडेलालाइ सुम्पेको जानकारी संघका सचिब झलक के सीले दिनु भएको छ।

 

नेपाल पर्यटन बर्ष २०११ लाइ सफल पार्ने एनआरएन पोर्चुगलको अभियानलाइ मैत्री संघको तर्फबाट होस्टेमा हैंसे गर्दै पोर्चुगिस प्रीन्ट, इलेक्ट्रोनिक तथा अनलाइन मेडियाहरुमा नेपाल पर्यटन बर्ष २०११ को प्रचार प्रसार र मेडिया क्याम्पेनिङ गर्न संघका मेडिया डाइरेक्टर पेद्रो मोटालाइ संयोजक तोकेको निर्णय भएको बताउंदै अध्यक्ष मकर हमालले यसबाट नेपालको रमणीय प्राकृतिक सुन्दरताको प्रचार प्रसारमा सहयोग पुगी नेपाल पर्यटन बर्ष २०११ मा बढि भन्दा बढि पोर्चुगिस पर्यटक नेपाल पठाउन र नेपाल प्रती पोर्चुगिसहरुको अभिरूची बढाउन सफलता मिल्ने बिश्वास ब्यक्त गर्नु भएको छ।