सोल २८ असार । दक्षिण कोरियाको एउटा युद्धपोतलाई समुद्रमा डुबाइदिएको घटनाबारे यसैहप्ता उत्तर कोरिया र अमेरिकी नेतृत्वको यूएन कमाण्डबीच वार्ता हुने भएको छ । राष्ट्रसङ्घ सुरक्षा परिषद्ले युद्धपोत डुबाउने घटनाको निन्दा गर्दै एक वक्तव्य अनुमोदन गरेको तीन दिनपछि यो घोषणा बाहिर आएको छ । वक्तव्यमा उत्तर कोरियालाई दोषी ठहर भने गरिएको छैन । एक अन्तरराष्ट्रिय अनुसन्धान टालीले मई महिनामा उत्तर कोरियाले तनावपूर्ण कोरियाली सागरमा टर्पेडो प्रहार गरी युद्धपोत डुवाइदिएको र त्यस घटनामा ४६ नाविकको मृत्युभएको निचोड निकालेको थियो । तर उत्तर कोरियाले यो आरोपको खण्डन गरेको छ । गएको महिनाको अन्त्यतिर यूएन कमाण्डले यो विषयमा उत्तर कोरियासँग जनरल तहको वार्ता गर्ने प्रस्ताव अघि सारेको थियो ।रासस/एपी